ក្រចេះ៖ ក្រុមសិក្សាស្រាវជ្រាវនៃរដ្ឋបាលជលផល និងអង្គការ WWF បានប្រទះឃើញកូនផ្សោតមួយក្បាលដែលទើបនឹងកើត បានហែលជាមួយហ្វូងផ្សោតពេញវ័យចំនួន ០៨ក្បាល នៅក្នុងអន្លង់កោះផ្តៅ ក្នុងស្រុកសំបូរ នៃខេត្តក្រចេះ កាលពីថ្ងៃទី០៦ ខែមីនា ឆ្នាំ២០២២។

យោងតាមការផ្សព្វផ្សាយ របស់នាយកដ្ឋានអភិរក្សជលផល នៃរដ្ឋបាលជលផល នៅថ្ងៃទី៧ ខែមីនា បានបញ្ជាក់ថា នេះគឺជាកូនផ្សោតទីមួយដែលបានកត់ត្រាក្នុងរយៈពេលបីខែដើមឆ្នាំ២០២២នេះ។

ដើម្បីធានាបានថា កូនផ្សោតនេះបន្តរស់រានមានជីវិត និងវិវត្តទៅជាផ្សោតពេញវ័យនៅក្នុងចំនួនសរុប រដ្ឋបាលជលផលសូមអំពាវនាវដល់បងប្អូនប្រជានេសាទមេត្តាចូលរួមការពារ និងបញ្ឈប់ជាបន្ទាន់នូវរាល់សកម្មភាពខុសច្បាប់ ពិសេសការនេសាទដោយប្រើឧបករណ៍មង និងឆក់។

សូមរម្លឹកថា កាលពីឆ្នាំ២០២១កន្លងទៅ កូនផ្សោតកើតថ្មីចំនួន ០៦ក្បាល ត្រូវបានកត់ត្រា៕